ఐరాసలో భారత్‌ గళం.. పాక్‌కు పరోక్ష హెచ్చరిక!

ఉగ్రవాద సంబంధాలున్న దేశాలకు ప్రమాదకర సాంకేతిక పరిజ్ఞానం చేరకుండా చూడాలని ఐరాస వేదికగా భారత్‌ పిలుపునిచ్చింది. సామూహిక విధ్వంసక ఆయుధాలు ఉగ్రవాదుల చేతుల్లోకి వెళ్లకుండా అన్ని దేశాలు అప్రమత్తంగా ఉండాలని కోరింది. పాకిస్థాన్‌ పేరును నేరుగా ప్రస్తావించకుండానే ఆ దేశాన్ని ఉద్దేశించి ఈ వ్యాఖ్యలు చేసింది.

ఐరాస జనరల్‌ అసెంబ్లీ మొదటి కమిటీ సమావేశంలో సోమవారం జనతాదళ్‌ (యునైటెడ్‌) ఎంపీ అలోక్‌ కుమార్‌ సుమన్‌ భారత్‌ తరఫున మాట్లాడారు. ఆయుధాలను హింసకు ఉపయోగించే చరిత్ర ఉన్న దేశాలు, ఉగ్రవాద సంబంధాలున్న దేశాలకు సున్నిత సాంకేతిక పరిజ్ఞానం బదిలీ కాకుండా జాగ్రత్తలు తీసుకోవాలని సూచించారు.

ఉగ్రవాదులు సామూహిక విధ్వంసక ఆయుధాలను పొందకుండా నిరోధించే తీర్మానాన్ని ఐరాసలో భారత్‌ 2002 నుంచి తీర్మానాలను ప్రవేశపెడుతోందని సుమన్‌ గుర్తుచేశారు. ఈ తీర్మానాన్ని సభ్యదేశాలన్నీ ఏకగ్రీవంగా ఆమోదించాయి. ఉగ్రవాదులు ఆయుధాలు, వాటి తయారీకి అవసరమైన పదార్థాలు, సాంకేతిక పరిజ్ఞానాన్ని పొందకుండా దేశాలు చర్యలు చేపట్టాలని ఇది సూచిస్తోంది.

రసాయన ఆయుధాల నిషేధ ఒప్పందం తనిఖీ నిబంధనల్లోనూ మార్పులు అవసరమని భారత్‌ భావిస్తోందని సుమన్‌ తెలిపారు. ఉగ్రవాదులు రసాయన ఆయుధాలను పొందే ముప్పును కూడా ఈ నిబంధనలు పరిగణనలోకి తీసుకోవాలని పేర్కొన్నారు.

జీవాయుధాల నిషేధ ఒప్పందానికి 50 ఏళ్లు పూర్తవుతున్న సందర్భంగా డిసెంబరులో న్యూఢిల్లీలో అంతర్జాతీయ సదస్సు నిర్వహించినట్లు వెల్లడించారు. 80 దేశాలు పాల్గొన్న ఈ సమావేశం జీవ భద్రత, ప్రజారోగ్యంలో భారత్‌ సామర్థ్యాన్ని చాటిందని చెప్పారు. రాబోయే 50 ఏళ్లలో ఈ ఒప్పందాన్ని బలోపేతం చేయడంలో గ్లోబల్‌ సౌత్‌ దేశాలు కీలక పాత్ర పోషించాలని పిలుపునిచ్చారు.